جسمانی سزا اور تشدد پسندی کی نفسیات

ہمارے سماج میں تشدد براے تادیب والدین اور اساتذہ کا جائز حق مانا جاتا ہے۔ اس سے تشدد براے اصلاح کا جواز پیدا ہوتا ہے۔ تشدد پسندی نفسیات کا حصہ بن جاتی اور مسائل کو بزورِ طاقت حل کرنے کی خُو پیدا ہوتی ہے۔ کسی انتہائی نوعیت کے واقعہ میں معاملے کی سنگینی واضح کرنے کی خاطر کبھی ہلکی پھلکی جسمانی سزا کی ضرورت شاید ہو سکتی ہے۔ شفقت آمیز والدین کی طرف سے اتنی سزا بھی تنبیہ کے لیے کافی ہو جاتی ہے۔تشدد کا جواز بہرحال کبھی پیدا نہیں ہوتا۔

بچوں کو نظم و ضبط، اخلاق و آداب اور کچھ ضروری مہارتیں سکھانے کے لیے کچھ سختی کرنا پڑتی ہے، مگر اس کے لیے بھی کسی جسمانی سزا کی ضرورت نہیں ہوتی۔ تشدد سے اصلاح اندازِ تربیت کی غلطی ہے۔ یہاں اصلاح کی ضرورت اصلاح کار کو ہے۔

براے تربیت بچوں پر تشدد کرنے کا مذہبی جواز رسول اللہ صلی اللہ علیہ وسلم سے منسوب ایک روایت سے پیش کیا جاتا ہے، جس میں بتایا گیا ہے کہ بچہ دس سال کا ہو جائے تو اسے نماز نہ پڑھنے پر سزا دی جائے۔ یہ روایت رسول اللہ صلی اللہ علیہ وسلم سے ثابت نہیں ہے۔¹ یہ روایت علم و عقل کے مسلّمات اور دین کے مجموعی مزاج سے بھی بظاہر متصادم نظر آتی ہے۔ جب شریعت میں نماز کا مکلف ہی بالغ فرد ہے تو دس سال کی عمر میں نماز ادا نہ کرنے پر مارنا ناقابل فہم ہے۔اِس کے ساتھ ساتھ نفسیات کے ماہرین بھی یہ بتا سکتے ہیں کہ بچپن کی یہ سختی کیسے انسانوں کے مزاج اور مذہب سے تعلق پر اثر انداز ہوتی ہے، جب کہ دوسری جانب رسول اللہ صلی اللہ علیہ وسلم جیسی کریم النفس شخصیت، جنھوں نے پوری زندگی دین کو نرمی، ملائمت اور استدلال سے سمجھایا، وہ کیسے علی الاطلاق ایسی ہدایت کر سکتے ہیں جو جسمانی مار، نفسیاتی دباؤ اور عبادت جیسے شعوری عمل کو زبردستی ادا کرانے کی ترغیب بن جائے۔²

تشدد پسندی ہمارے جاگیر دارانہ کلچر میں شامل ہے۔ رعایا کو زیرِ نگیں رکھنے کے لیے ان پر تشدد کے مظاہرے ایک لازمی عنصر کے طور پر اس کلچر کا حصہ چلے آئے ہیں۔ اسی کے مظاہر ہیں جو ہم مختلف صورتوں میں دیکھتے ہیں۔ ہماری علاقائی زبانوں میں موجود محاورے اور ضرب الامثال تشدد پسندی کے جواز کے عکاس ہیں۔ بابا بلھے شاہ سے منسوب یہ اشعار یہی بیان کرتے ہیں:

چار کتاباں اتوں لتھیاں، اتوں لتھا ڈنڈا

چار کتاباں کج نہ کیتا، سب کج کیتا ڈنڈا

(چار الہامی کتابیں اوپر سے نازل ہوئیں اور ڈنڈا بھی اوپر سے نازل ہوا۔ چاروں کتابوں سے کچھ نہ ہوا، جو کچھ ہوا ڈنڈے سے ہوا۔)

بچے کو استاد کے حوالے کرتے ہوئے والدین اور سرپرستوں کا یہ کہنا کہ ’’بچے کی ہڈیاں ہماری اور گوشت آپ کا‘‘ یعنی بچے کی ہڈیاں نہ ٹوٹیں، باقی کھال پر جتنا چاہیں مشق ستم کیجیے، تشدد کے جواز کا بیانیہ ہے۔ لوگ فخر سے بیان کرتے ہیں کہ بچپن میں انھوں نے والدین اور اساتذہ سے کتنی مار کھائی۔ چنانچہ ہمارے ہاں جسمانی سزائیں آخری چارۂ کار نہیں، بلکہ ترجیحاً اختیار کی جاتی ہیں۔

تشدد سے تربیت پانے والے بچوں میں ڈر، عدم تحفظ، منافقت، جھوٹ، بدیانتی، بزدلی، بد تمیزی اور طاقت کے بل پر مفاد اور مقاصد کے حصول کی خصلتیں پیدا ہو جاتی ہیں۔

سماج اس وقت اگر اخلاقی حالت کی ناقابلِ رشک سطح پر نظر آتا ہے اور تشدد پسندی اور طاقت کے بل پر مسائل حل کرنے کو درست سمجھتا ہے تو اس کے پیچھے تشدد براے اصلاح کے بیانیے کا گہرا عمل دخل ہے۔ لوگوں کی بڑی تعداد یہ یقین رکھتی ہے کہ ملک میں مثبت تبدیلی لانے کا واحد مؤثر طریقہ یہ ہے کہ کرپٹ سیاست دانوں کو سولی چڑھا کر ملک کو ان سے پاک کر کے تعمیر نو کی بنیادیں رکھی جائیں۔آمریت کو پسند کرنے والے بھی اسی نفسیات کے حامل ہیں۔ انھیں ملک کے مسائل کا حل ایک مطلق العنان حکمران میں نظر آتا ہے جو اپنے آہنی ہاتھوں سے سب کچھ درست کر دے۔ اپنے مطالبات منوانے کے لیے مختلف گروہوں کا سرکاری اور نجی املاک کی توڑ پھوڑ کرنا، سیاسی انتخابات اور مذہبی اجتماعات کے دوران میں ہونے والے پر تشدد جھگڑے اسی تشدد پسندی کے مظاہر ہیں۔ یہاں تک کہ طب کا شعبہ بھی اس بہیمانہ نفسیات سے محفوظ نہیں۔ ڈاکٹر حضرات ہڑتال کے دوران میں مریضوں کی جانوں کو یرغمال بنا کر اپنی مانگیں پوری کروانا درست سمجھتے ہیں۔ وکلا جتھا بندی کر کے مخالفین پر حملے اور تشدد کے جواز پیش کرتے ہیں۔ پولیس زیر حراست ملزمان پر تشدد روا سمجھتی ہے۔ سڑکیں بند کر کے لوگوں کے روزگار، بلکہ بسا اوقات ان کی زندگیوں کو داؤ پر لگا کر اپنے مطالبات منوانا معقول گردانا جاتا ہے۔

فرد اور سماج میں حقیقی تبدیلی کن عوامل کے تحت آتی ہے اور اس میں کتنا وقت لگتا ہے، تشدد پسند ذہنیت اس نفسیاتی اور سماجی سائنس سے نابلد ہوتی ہے۔ جس تبدیلی کا خمیر طاقت کے استعمال اور تخریب پر رکھا جائے اس کے کیا نتائج نکلتے ہیں، تاریخ کے المناک تجربات سے یہ نفسیات واقف نہیں۔ ڈر اور خوف سے اختیار کی گئی تبدیلی منفی اور ناپائیدار ہوتی ہے۔ تبدیلی وہی دیرپا ہوتی ہے جس کے لیے انسانی شعور کو مخاطب کیا جائے اور اس میں وقت لگتا ہے۔

بچوں کے رویوں میں مثبت کردار پیدا کرنے اورمنفی عادات کی روک تھام کے لیے والدین اور اساتذہ کے ذاتی حقیقی کردار اور اچھے ماحول کی دستیابی سے بڑھ کر کوئی چیز موثر نہیں ہوتی۔ بچوں پر تشدد ایک بھیانک عمل ہے جس کے نتائج فرد اور خاندان سمیت پورا سماج بھگتتا ہے۔ بچوں پر تشدد کی روک تھام کے لیے ضروری ہے کہ قانون بھی اس سلسلے میں اپنا موثر کردار اداکرے۔ اس سلسلے میں کرنے کا پہلا کام خود پولیس کی درست ذہنی تربیت ہے۔