حیرہ، غسّان اور کندہ (1)

گزشتہ صفحات میں یمنی قبائل کی عظیم ہجرت اور شمالی عرب کے طول و عرض میں اُن کے آباد ہو جانے کا ذکر ہوا نیز یہ بھی بیان ہوا کہ کندہ،لخم اور غسّان، جنھیں عربی ادب کے پس منظر میں خصوصی اہمیت حاصل ہے، کا تعلق انھی یمنی قبائل سے ہے۔ ان تینوں خانوادوں کو اپنے اپنے علاقے میں شاہانہ رسوخ حاصل رہا جس سے دور جاہلیت میں عربوں کی ثقافت اور ادب پر گہرے اثرات مرتب ہوئے۔

عرب کے قدیم سیاسی نقشے پر نگاہ ڈالنے سے واضح ہو جاتا ہے کہ اُس دور میں جزیرہ نمائے عرب شمال کی جانب دنیا کی دو عظیم ترین مملکتوں ــــ ایران اور روم ــــ سے متصل تھا۔ لیکن عربوں کی قبائلی زندگی کی نوعیت اور ان کی سرزمین کے جغرافیائی کوائف کچھ ایسے تھے کہ یہ عظیم طاقتیں بھی اُن کو اپنا تابع فرمان نہ بنا سکتی تھیں اور ان کی سرحدی لوٹ مار سے زچ رہتی تھیں۔ تاہم انھوں نے اس مسئلے کا نہایت دانشمندانہ حل تلاش کر لیا، یعنی اپنے سرحدی علاقوں پر عرب ہی کے بعض قبائل کو اپنا با اختیار نمایندہ بنا کر بٹھا دیا۔ اس طرح ایرانی سرحد پر ’’حیرہ ‘‘کی ’’لخمی‘‘ اور رومی سرحد پر ’’غسّانیوں‘‘ کی ریاست وجود میں آئی۔ چونکہ ایران اور روم با ہم ایک دوسرے کے حریف تھے اس لیے ’’حیرہ ‘‘ اور ’’غسّان ‘‘ بھی باہم متحارب اور ایک دوسرے کے دشمن رہے۔

لخمیوں کا پایۂ تخت ’’حیرہ ‘‘ کا مقام تھا جس کا محل وقوع کوفے سے تقریباً تین میل جنوب میں قدیم بابل کے نزدیک تھا۔¹ بعد کے زمانوں میں جہاں بغداد، کوفہ اور بصرہ آباد ہوئے،وہاں سے لے کر خلیج کے ساتھ ساتھ بحرین تک کا علاقہ اس ریاست کی قلمرو میں شامل تھا۔ لخم² میں چونکہ یکے بعد دیگرے کئی امیر ’’مُنذِر ‘‘ نام کے گزرے لہٰذا مجموعی طور پر اس خاندان کو ’’مناذرہ ‘‘کے نام سے بھی یاد کیا جاتا ہے اور سرزمین عراق کی نسبت سے ’’العراقیون‘‘ بھی کہا جاتا ہے۔³ علاوہ ازیں ان کے جد اعلیٰ ’’نصر بن ربیعہ ‘‘ کی نسبت سے’’ ملوک آل نصر“ بھی کہہ لیتے ہیں۔⁴

حیرہ کے متمدن باشندوں میں ’’العباد ‘‘ـــ (وا= عبد ـــ ’’بندگانِ خدا ‘‘ یا ’’غلامانِ مسیحؑ‘‘ ) ـــ کا طبقہ خاص طور پر قابل ذکر ہے۔ یہ لوگ فرقۂ نسطوریہ سے تعلق رکھنے والے عیسائی تھے اور انھیں متمدن عیسائی معاشروں کی تاریخ میں اولین عربی الاصل طبقہ شمار کیا جاتا ہے۔ رنگ اور نسل کی عصبیت کو ترک کر کے عقیدہ و مسلک کی بنیاد پر ایک برادری کے تصور کو اختیار کرنا واضح طور پر عربوں کے جاہلی قبائلی معاشرے میں ’’العباد ‘‘ کی ذہنی برتری کی دلیل ہے۔ اور حقیقت بھی یہی ہے کہ یہ لوگ اپنے دیگر ہم وطنوں کی نسبت زیادہ مہذب اور روشن دماغ تھے۔ عربی کے علاوہ ان میں، فارسی اور سریانی ـــ ( اور ممکن ہے یونانی) ـــ جاننے والے بھی موجود تھے۔ سریانی ان کے مذہبی اداروں میں سکھائی جاتی تھی۔ العباد لکھنا پڑھنا جانتے تھے۔⁵ عربوں میں فن تحریر کا تعارف بیشتر انھی کی وساطت⁶ سے ہوا اور عیسائیت کی ترویج بھی۔⁷ جس کا اثر بالآخرلخم کے شاہی خانوادے پر بھی پڑا۔ ⁸ ایک خیال یہ بھی ہے کہ حیرہ میں نصرانیت کا سرچشمہ دراصل وہ رومی جنگی قیدی تھے جو ہر مزاوّل کے دور میں یہاں آئے۔ یہ لوگ طب، ہندسہ اور فنون لطیفہ میں اچھی دستگاہ رکھتے تھے اور یونانی تہذیب و ثقافت کا رنگ ان پر خوب چڑھا ہوا تھا، کیا عجب کہ ان کی وساطت سے یونانی علوم وفنون کا پر تو بھی اہلِ حیرہ کے ذہن پر پڑا ہو۔⁹

یہ تھی حیرہ کی وہ فضا جہاں ایرانیوں نے مخصوص سیاسی مصلحتوں کے تحت لخم کی ریاست قائم کی جو ـــ ہشام بن محمد الکلبی کی روایت کے مطابق ـــ 522 سال 8 ماہ قائم رہی¹⁰ اور جو عربوں میں ایرانی تہذیب و ثقافت کی تنفیذ کا ایک اہم ذریعہ، ان کے شعراء کے لیے ایک پرکشش مرکز اور اُن کی ادبی سرگرمیوں کا ایک نمایاں پس منظر بنی رہی۔ طرفہ بن العبد، عبید بن الا برص، عمرو بن كلثوم، حارث بن حلّزہ، نابغہ ذبیانی اور عدی بن زید جیسے سر بر آوردہ جاہلی شعراء کی زندگی کے نشیب و فراز لخم اور حیرہ ہی کے محور پر گردش کرتے ہیں۔ جذیمۃ الابرش، زباء، خَورنَق، سدیر، سنمّار، یومِ نعیم اور یومِ بؤس سے متعلق حکایات و اساطیر، جو عربوں کے اجتماعی حافظے کا جزو بن گئیں اور جن کی مختصر سی جھلکیاں آئندہ صفحات میں پیش کی جائیں گی، اس بات کی شاہد ہیں کہ سرزمین حیرہ نے عربوں کے ذہن پر نہایت ہی گہرے اور دیر پا نقوش چھوڑے۔

حیرہ میں ریاست لخم کا با ضابطہ قیام عمرو بن عدی لخمی سے ہوتا ہے۔ جسے شاہپور اول ساسانی نے اپنے دور حکومت (272-241ء) کے دوران نامزد کیا۔ اگر چہ عمرو سے پہلے اُس کا نا نا مالک بن فہم الازدی اور بعد ازاں ماموں جذیمۃ الأبرش شاہپور کے باپ اردشیر بابکان بانی دولت ساسانیہ کے دور (241-226ء) میں ایسے ہی منصب پر فائز تھے اور عمرو نے یہ منصب انھی کے تسلسل میں پایا لیکن وہ باعتبار خاندان از دی تھے لخمی نہ تھے، دوسرے ان کا پایۂ تخت انبار تھا نہ کہ حیرہ،¹¹ چنانچہ انھیں لخمیان حیرہ میں شمار نہیں کیا جاسکتا۔ تاہم ایک طرف تو خود عمرو کے احوال زندگی کا پس منظر اُن سے مربوط ہے، دوسرے اُن سے متعلق جو حکایات مشہور ہوئیں، قطع نظر اس سے کہ وہ تاریخی اعتبار سے معتبر ہوں یا نا معتبر، عربی ادب کے حوالے سے نہایت اہم ہیں۔ چنانچہ یہاں اُن کا مختصر سا تذ کرہ نا مناسب نہ ہوگا۔

مالک بن فہم الازدی حیرہ و انبار کے عربوں کا پہلا ’’بادشاہ‘‘ تصور کیا جاتا ہے۔ کہتے ہیں کہ اُس کے بیٹے، سلیمہ، نے رات کی تاریکی میں غلطی سے اُسے تیر کا نشانہ بنا دیا۔ جب اُسے معلوم ہوا کہ اُس کا قاتل اُس کا اپنا ہی بیٹا ہے تو اُس نے چند شعر کہے جن میں سے یہ بہت مشہور ہے:

اُعلّمه الرماية كل يوم

فلما اشتد¹² ساعده رمانی

’’میں اُسے ہر روز قدر اندازی کا فن سکھایا کرتا تھا سو جب اُس کی کلائی زور پکڑ گئی تو اُس نے مجھی کو نشانہ بنا دیا۔‘‘

مالک کے بعد اُس کا بھائی عمرو بن فہم اور پھر بیٹا جذیمۃ الأبرش سریر آرا ہوئے۔ جذیمہ بہت ہوش مند اور طاقت ور بادشاہ ثابت ہوا۔ بزور شمشیر اُس نے آس پاس کے بہت سے علاقوں کو باجگزار بنا لیا۔ حیرہ و انبار سے لے کر بقّۃ، ہیت، عین التمر، العمیر،¹³ قطقطانۃ اور خفیّۃ تک کے علاقے اُس کے تصرف میں آگئے۔ وہ پہلا عرب حکمران ہے کہ منطقۂ عراق کے کل عرب قبائل سمٹ کر اُس کے جھنڈے تلے یکجا ہو گئے۔ اُسے برص کی بیماری تھی اور اس اعتبار سے اُس کا لقب ’’الأبرص‘‘ ہونا چاہیے تھا لیکن از روئے ہیبت و تعظیم عربوں نے کنائے سے کام لیا اور اسے الأبرش ـــ (گلدار) اور ’’الوضّاح‘‘ (سپید و درخشاں) ـــ کے القاب سے پکارا۔ جذیمہ کے غرورِ شاہانہ کا یہ عالم تھا کہ وہ روئے زمین پر کسی کو اپنی ہم نشینیِ شراب کا اہل نہیں سمجھتا تھا اور جب شراب پینے بیٹھتا تو ایک ایک جام فرقدین¹⁴ کے نام کا زمین پر لنڈھا دیتا کہ وہی میرے ہم نشینِ شراب ہیں۔ ¹⁵

بنو لخم کے ایک نو عمر لڑ کے عدی بن نصر کی خوبروئی اور ذہانت کا شہرہ سن کر جذیمہ اُس کے حصول کے لیے کوشاں ہوا اور بالآخر اسے حاصل کر کے اپنی ساقی گری پر مامور کیا۔ جذیمہ کی بہن رقاش بنت مالک نے اُسے دیکھا تو فریفتہ ہو کر نامہ و پیام کا سلسلہ جاری کر دیا اور خواہش ظاہر کی کہ وہ جذیمہ سے اُس کا رشتہ مانگے۔ لیکن عدی نے عدم دلچسپی کا اظہار کیا اور کہا کہ مجھے ایسی بات کہنے کی جرأت نہیں۔ رقاش نے کہا کہ جب وہ شراب پینے بیٹھے تو اُسے خالص شراب پلانا اور دوسرے لوگوں کو ملونی والی شراب دینا۔ اور جب نشہ اُس کے حواس پر خوب طاری ہو جائے تو اُس سے میرا رشتہ طلب کرنا۔ اس صورت میں وہ انکار نہ کر سکے گا۔ سو جب وہ یہ رشتہ طے کر دے تو سب لوگوں کو گواہ کر لینا۔

عدی نے کامیابی کے ساتھ اس تجویز پر عمل کیا اور شادی ہوگئی۔ جب جذیمہ کے حواس بجا ہوئے اور صورتِ حال اُس پر واضح ہوئی تو اُس نے بہت پیچ و تاب کھایا اور بہن کو لعنت ملامت کی لیکن اُس نے کہا کہ میرا اس میں کچھ قصور نہیں۔ آپ نے خود اپنی مرضی سے مجھے اُس کی زوجیت میں دیا تھا۔ جذیمہ کو اُس کا عذر قبول کرنا پڑا۔ عدی البتہ خائف ہو کر اپنے ننھیال بنو اِیاد میں روپوش ہو گیا اور کچھ عرصے بعد پہاڑوں میں شکار کھیلتے ہوئے ایک ساتھی کے دھکا دے دینے کے باعث کھڈ میں گر کر ہلاک ہو گیا۔¹⁶

کچھ عرصے بعد رقاش کے ہاں لڑکا پیدا ہوا جس کا نام اُس نے عمر و رکھا۔ (یہی وہ عمرو بن عدی ہے جو آگے چل کر حیرہ کی دولت لخمیہ کا بانی ثابت ہوا۔ ) جب عمروذ را بڑا ہو گیا تو ایک روز رقاش نے بنا سنوار کر خوشبو لگا کر اُسے جذیمہ کے پاس بھیجا۔ جذیمہ کو بھانجے پر بہت پیار آیا اور پھر عمرو اُس کے بچوں کے ساتھ ساتھ رہنے لگا۔ جذیمہ اُس کی غیر معمولی ذہانت پر بہت خوش ہوتا۔ اُس نے چاندی کی ایک ہنسلی اُس کے گلے میں ڈلوائی اور اسی سبب سے اُس کا لقب ’’ عمرو ذو الطّوق‘‘ ہوا۔¹⁷

پھر اچانک ایک روز عمرو کو جنات لے اُڑے۔ جذیمہ نے ایک مدت ہر چند تلاش کیا مگر کچھ پتا نہ پایا۔ آخر یہ اتفاق ہوا کہ قضاعہ کی شاخ بلقین (بنی القین) کے دو بھائیوں مالک اور عقیل کو اتفاقاً عمرو بڑی خستہ حالی میں مل گیا اور وہ اُسے جذیمہ کے پاس واپس لے آئے۔ جذیمہ بہت خوش ہوا اور انھیں منہ مانگا انعام دینے کا فیصلہ کیا۔ انھوں نے تاحیات جذیمہ کی ہم نشینیِ شراب کا شرف مانگا۔ چنانچہ ایک روایت کے مطابق چالیس برس تک¹⁸ انھیں یہ حیثیت حاصل رہی اور وہ ’’ندمانا جذیمۃ‘‘ـــ (جذیمہ کے دوندیم) ـــ کے لقب سے معروف ہوے اور طویل یکجائی کے سلسلے میں ضرب المثل ٹھیرے۔¹⁹

اُن دنوں الجزیرہ اور مشارف الشام کے علاقوں میں عمرو بن ظرب بن حسان بن اُذینۃ²⁰ العملیقی کو اقتدار حاصل تھا۔ جذیمہ نے اس پر لشکر کشی کی اور فتحیاب ہوا۔ عمرو بن ظرب مارا گیا۔اُس کی دو بیٹیاں نائلہ اور زبیبہ²¹ نام کی تھیں۔ نائلہ اس کے بعد ’’الزّبّاء‘‘ کے لقب سے حکمران ہوئی اور جذیمہ پر چڑھائی کا ارادہ کیا۔ لیکن زبیبہ کے مشورے سے یہ طے پایا کہ جنگ میں شکست کا خطرہ مول لیے بغیر جذیمہ کو مکر و فریب سے ہلاک کیا جائے۔ چنانچہ الزّبّاء نے جذیمہ کو پیغام بھیجا کہ مجھ عورت ذات سے حکومت نہیں سنبھلتی لہٰذا تم آکر مجھ سے شادی کر لو اور یکجا سارا نظم و نسق سنبھال لو۔ جذیمہ فریب میں آگیا اور ساحل فرات پر بمقام ’’بقّہ‘‘ مجلس مشاورت آراستہ کی۔ سب نے یہی مشورہ دیا کہ زبّاء کی دعوت قبول کر کے اپنی سلطنت میں اضافہ کر لینا چاہیے لیکن بنو لخم سے ایک وفا دار مصاحب، قصیر بن سعد، جو جذیمہ کی ایک لونڈی کے بطن سے تھا اور نہایت زیرک اور معاملہ شناس تھا، اس رائے سے متفق نہ ہوا۔ اُس نے کہا: ’’رأی فاتر وغدر حاضر‘‘ ’’مشورہ ناقص ہے اور ایک کھلا فریب در پیش ہے۔‘‘ سو یہ الفاظ ضرب المثل ہو گئے۔ قصیر کی رائے تھی کہ جذیمہ زبّاء کو جواب لکھ دے کہ وہ خود چلی آئے لیکن باقی سب کی رائے ایک طرف تھی چنانچہ جذیمہ نے قصیر سے کہا: ’’ رأيك في الكنّ لا في الضّحّ ‘‘ ’’تمھاری رائے درونِ خانہ تو بہت خوب ہے مگر میدانِ عمل کے لیے مناسب نہیں۔ ‘‘ سو یہ بھی ضرب المثل ٹھیری قصیر نے کہا: ’’لا يطاع لقصير أمر ‘‘ ’’قصیر بیچارے کی کون سنتا ہے۔ ‘‘ سو یہ بھی مثل ہوئی۔

[باقی]

خیال و خامہ