الفصل 2: حدیث کی جمع و تدوین

رسول اللہ صلی اللہ علیہ وسلم کے قول وفعل اور تقریر وتصویب کے اخبارِآحاد کو ’’حدیث‘‘ سے تعبیر کیا جاتا ہے۔ یہ وہ روایات ہیں، جو خبر واحد کے ذریعے سے اور روایت بالمعنیٰ کے طریقے پر ہم تک پہنچی ہیں، یعنی لوگوں نے اِنھیں نبی صلی اللہ علیہ وسلم سے اپنی سماعت کی حد تک سنا ہے ، اپنی یادداشت کی حد تک یاد رکھا ہے ، اپنے فہم کے مطابق سمجھا ہے، اپنے الفاظ میں ترتیب دیا ہے اوراپنی صواب دید سے منتقل کیا ہے۔اِس طریقے سے حاصل ہونے والے علم کے بارے میں مسلم ہے کہ یہ درجۂ یقین کو نہیں پہنچتا۔ اِس سے ظن غالب یا قوی گمان حاصل ہوتا ہے، جسے یقینیات کی بنیاد نہیں بنایا جا سکتا ۔ درجۂ یقین کو وہی علم پہنچتا ہے، جو اجماع و تواتر سے منتقل ہوا ہو۔ قرآنِ مجید اور سنت کا یہی معاملہ ہے۔ یہ دونوں صحابۂ کرام رضی اللہ عنہم کے اجماع اور قولی و عملی تواتر سے ملے ہیں اور ہر دور میں مسلمانوں کے اجماع سے ثابت ہوتے ہیں۔ اِن کے مقابل میں احادیث کی روایات اخبارِ آحاد میں محصور ہیں، یعنی نہ وہ صحابۂ کرام کے اجماع اور قولی تواتر سے ملی ہیں اور نہ ہر زمانے میں مسلمانوں کے اجماع سے ثابت ہوتی ہیں، لہٰذا اِن سے حاصل ہونے والے علم کو اصل اور ضروری قرار دینے کے بجاے، بالعموم شرح و فرع تک محدود سمجھا جاتا ہے۔یعنی اِس کی نوعیت دین کی تفہیم و تبیین کی ہے۔¹

یہ علم رسول اللہ صلی اللہ علیہ وسلم کے قول و فعل اور تقریر و تصویب کی روایات کی صورت میں موجود ہے۔اِنھیں صحابۂ کرام رضوان اللہ علیہم اجمعین میں سے متعدد صحابۂ کرام نے اپنی انفرادی حیثیت میں روایت کیا ہے اور علما اور محدثین کی ایک جماعت نے اِسے مرتب کر کے آگے منتقل کیا ہے۔

احادیث اور صحابۂ کرام رضی اللہ عنہم

احادیث کے بارے میں یہ بات تسلیم کی جاتی ہے کہ زمانۂ نزولِ قرآن میں احادیث کو لکھنے اور جمع کرنے پر پابندی عائد رہی ہے۔ اِس کا مقصد کلام الٰہی کو بالکل متعین اور ممیز رکھنا تھا۔ تاہم، بعد ازاں یہ پابندی اٹھا لی گئی اور لوگ اپنی خواہش سے احادیث لکھنے اور جمع کرنے لگے۔²

قرآن و سنت³ کی اگلی نسلوں تک بہ حفاظت منتقلی صحابۂ کرام کی اولین ذمہ داری تھی، اِس لیے اُنھوں نے بہ حیثیتِ جماعت اِس ذمہ داری ⁴کو نبھایا اور اپنے اجماع و تواتر سے پورے اہتمام کے ساتھ اِنھیں امت کو منتقل کیا۔ اِس معاملے میں کسی غلطی یا انحراف سے محفوظ رہنے کے لیے حکومت وریاست کے وسائل کو بھی بروے کار لایا گیا۔

احادیث کے حوالے سے اِس سطح کا اہتمام نہیں کیا گیا۔ اُسے افراد کی انفرادی کاوش اور صواب دید پر چھوڑ دیا گیا۔⁵

صحابہ کا مختلف طرزِ عمل

چنانچہ بعض صحابۂ کرام نے کثیر تعداد میں احادیث روایت کیں، بعض نے بہ قدرِ ضرورت اِس کا اہتمام کیا اور بعض نے اِس سے اجتناب کیا۔

جن صحابہ نے اِنھیں ذہن نشین کیا اور اپنے رفقا و تلامذہ تک منتقل کیا، اُن کا موقف یہ تھا کہ نبی صلی اللہ علیہ وسلم کے اقوال و افعال کو ہر ممکن حد تک جمع کرنے کی کوشش کی جائے تاکہ آپ کی ہر بات محفوظ ہو جائے اور لوگوں کو قرآن و سنت کے احکام کو سمجھنے اور اُن کا اطلاق کرنے میں آسانی ہو جائے۔ حضرت ابو ہریرہ رضی اللہ عنہ سے5374، حضرت عبداللہ بن عمر رضی اللہ عنہ سے 2630، حضرت انس بن مالک رضی اللہ عنہ سے2286، حضرت عائشہ رضی اللہ عنہا سے 2210، حضرت عبداللہ بن عباس رضی اللہ عنہ سے 1660، جابر بن عبداللہ رضی اللہ عنہ سے 1540اورحضرت ابو سعید خدری رضی اللہ عنہ سے 1170 احادیث مروی ہیں۔ اِن صحابہ کو ’مکثرین الحدیث‘ کہا جاتا ہے۔⁶

جن صحابہ نے اِس معاملے میں احتیاط اور توقف کا رویہ اختیار کیا ، اُن کا ترددیہ تھا کہ کہیں اِس میں حک و اضافے کی کوئی غلطی صادر نہ ہو جائے اور اُنھیں قیامت میں اللہ کے حضور جواب دہ ہونا پڑے۔جن صحابہ نے یہ رویہ اختیار کیا، اُن میں سے حضرت ابو بکر رضی اللہ عنہ سے 143، حضرت عمر رضی اللہ عنہ سے 537، حضرت عثمان رضی اللہ عنہ سے 146، حضرت علی رضی اللہ عنہ سے 586، ام المومنین حضرت ام سلمہ رضی اللہ عنہا سے 378، حضرت عبداللہ بن مسعود رضی اللہ عنہ سے 848 اور حضرت معاذ بن جبل رضی اللہ عنہ سے 146روایات منقول ہیں۔⁷

دین کی توسیع و اشاعت صحابۂ کرام رضی اللہ عنہم کی اولین ذمہ داری تھی۔ چنانچہ خلافتِ راشدہ کے زمانے میں اُنھوں نے قرآنِ مجید اور سنننِ ثابتہ کی ترویج و اشاعت اور تعلیم و تدریس کا بھر پور اہتمام کیا، مگر احادیث کی جمع و تدوین اور تعلیم و تدریس کے حوالے سے حکومتی سطح پر کوئی اقدام نہیں کیا گیا۔ حضرت ابوبکر صدیق اور حضرت عمر رضی اللہ عنہما کے بارے میں معلوم ہے کہ اُنھوں نے احادیث پر مشتمل اپنے اپنے صحائف لکھ رکھے تھے، مگر اُنھوں نے اُن کا اجرا کرنے کے بجاے اُنھیں تلف کرنا مناسب خیال کیا۔⁸ حضرت علی رضی اللہ عنہ کے حوالے سے بھی ایک صحیفے کا ذکر ملتا ہے، مگر اُس میں صرف زکوٰۃ و دیت سے متعلق احادیث تھیں۔⁹ اُن کا یہ طرزِ عمل واضح کرتا ہے کہ وہ احادیث کو اصل دین کے مقام میں نہیں، بلکہ تفہیم و تبیین کے محل میں رکھتے تھے۔ اگر وہ اُنھیں اصل دین کی جگہ دیتے اور اُن کی صحت کے بارے میں قرآن و سنت ہی کی طرح مطمئن ہوتے تو وہ اِس معاملے میں کسی تردد کا مظاہرہ ہرگز نہ کرتے۔

تاہم، جہاں تک بیش تر صحابہ کے انفرادی عمل کا تعلق ہے تو اِس سطح پر اُنھوں نے رسول اللہ صلی اللہ علیہ وسلم کے قول و فعل کو اپنے فکر و عمل میں بہ طورِ دلیل بھی پیش کیا، شریعت کی تعبیر و تشریح میں بھی اُس سے استشہاد کیا ، اُسے اپنے اعزہ و احباب اور رفقا و تلامذہ کو منتقل بھی کیا۔

صحابہ کے تحریری مجموعے

بعض صحابہ نے احادیث کو تحریری طور پر مرتب بھی کیا یا اپنے تلامذہ سے مرتب کرایا۔ اِن میں سے جن مجموعوں کا ذکر عام طور پر ملتا ہے، وہ یہ ہیں : صحیفۂ حضرت عثمان رضی اللہ عنہ، صحیفۂ حضرت علی رضی اللہ عنہ، الصحیفۃ الصادقہ از حضرت عبداللہ بن عمرو بن العاص رضی اللہ عنہ ، الصحیفۃ الصحیحہ از حضرت ابو ہریرہ رضی اللہ عنہ (مرتبہ : ھمام بن منبہ)، صحیفۂ حضرت جابر بن عبداللہ رضی اللہ عنہ ۔ اِن کے علاوہ حضرت انس بن مالک، حضرت عبداللہ بن عباس، حضرت سمرہ بن جندب رضی اللہ عنہم اور چند دیگر صحابہ کے حوالے سے احادیث لکھ کر جمع کرنے کا ذکر بھی ملتا ہے۔

بدقسمتی سے حدیث کے اِن مجموعوں میں سے کوئی مجموعہ بھی امت کو آگے منتقل نہیں ہو سکا۔ اِس کا سبب یہ بھی ہو سکتا ہے کہ بعض صحابۂ کرام رضی اللہ عنہم نے احتیاط کی غرض سے اُنھیں آگے منتقل کرنا مناسب نہ سمجھا ہو اور یہ بھی ہو سکتا ہے کہ اُنھوں نے اپنے اعزہ و احباب اور تلامذہ کے ذریعے سے آگے منتقل تو کیا ہو ،مگر تابعین اور تبع تابعین کے دور اور اُن کے بعد کے ادوار میں اُن کی مرویات کو جامع کتب میں شامل کر لیا ہو اور اُنھیں منفرد حیثیت میں قائم رکھنے کی ضرورت محسوس نہ کی گئی ہو۔

ان میں سے دوسرا امکان زیادہ قرین قیاس ہے اور اِس کی ایک دلیل بیسویں صدی عیسوی میں ’’ صحیفۂ ہمام بن منبہ‘‘ کی دریافت ہے۔ یہ جب دریافت ہوا تو معلوم ہوا کہ اِس کی تمام روایات اسی ترتیب سے ’’مسند احمد بن حنبل‘‘ میں نقل ہوئی ہیں۔ ’’صحیح بخاری‘‘ میں بھی مختلف عنوات کے تحت اِس کی 91 احادیث شامل ہیں۔¹⁰

احادیث اور صحابہ کے بعد کا زمانہ

صحابۂ کرام سے آگے یہ احادیث تابعین، تبع تابعین ، تبع تبع تابعین اور بعد کے محدثین کے سلسلۂ روایت سے ہم تک پہنچی ہیں۔¹¹

دوسری صدی ہجری میں، یعنی رسول اللہ صلی اللہ علیہ وسلم کے دنیا سے رخصت ہو جانے کے کم و بیش ایک سو سال بعد علما میں حدیث کی جمع و تدوین کا شوق نمایاں ہونا شروع ہو گیا۔چنانچہ اُنھوں نے احادیث کو حاصل کرنے کے لیے دور دراز کے سفر بھی کیے۔ لوگوں میں اِس علمی رحلت کو بہت قدر کی نگاہ سے دیکھا جانے لگا۔¹²

حدیث کے طالبِ علموں کے یہ سفر جہاں اُن کے نبی صلی اللہ علیہ وسلم کے علم سے اکتساب فیض کے شوق کو نمایاں کرتے ہیں، وہاں اِس حقیقت کو بھی واضح کرتے ہیں کہ محدثین کی یہ کاوشیں اصل دین کے حصول کے لیے نہیں تھیں۔ وہ اُن کے پاس قرآن و سنت کی صورت میں موجود تھا۔ اُن کا مقصد ازدیادِعلم تھا، دین کی تفہیم مزید تھا اور نبی صلی اللہ علیہ وسلم کے دین پر عمل، یعنی اسوۂ حسنہ سے فیض یاب ہونا تھا۔ اگر اصل دین کے حصول کو اِن کاوشوں کا محرک سمجھا جائے تو پھر یہ ماننا پڑے گا کہ رسالت مآب صلی اللہ علیہ وسلم کے رخصت ہونے کے سو ڈیڑھ سوسال تک مکمل دین یا اُس کی ضروری معلومات معاذاللہ لوگوں تک نہیں پہنچ سکی تھیں۔ یہ ماننا، ظاہر ہے کہ قرآنِ مجید کےبھی خلاف ہے اور تاریخی شہادت کے بھی مطابق نہیں ہے۔

احادیث کی جمع و تدوین کا اہتمام

حکومت و ریاست کی سرپرستی میں احادیث کی جمع و تدوین کا کام سب سے پہلے حضرت عمر بن عبدالعزیز نے انجام دیا۔ وہ تابعی تھے اور خود بھی محدث تھے۔ اُن کا شمار حضرت انس بن مالک رضی اللہ عنہ کے تلامذہ میں ہوتا ہے۔ وہ99ھ میں خلیفہ بنے اور اُنھوں نے مختلف علاقوں کے علما و محدثین کو احادیث جمع کرنے کےکام پر مامور کیا۔ اُنھیں ڈر تھا کہ کبار تابعین کی وفات سے حدیث کا علم ضائع نہ ہو جائے۔ حضرت عمر بن عبدالعزیز نے جن شخصیات کو اِس کام پر مقرر کیا ،اُن میں سب سے نمایاں نام ابنِ شہاب زہری کا ہے۔ حضرت عمر بن عبدالعزیز صرف دو سال اقتدار میں رہنے کے بعد 101 ھ میں وفات پا گئے۔¹³

درجِ بالا تفصیل سے اِس موقف کی تردید ہوتی ہے کہ حدیث کی جمع و تدوین کا کام رسالت مآب صلی اللہ علیہ وسلم کے دو اڑھائی سو سال بعد شروع ہوا۔ تاریخ اِس امر کی شہادت دیتی ہے کہ اُنھیں یاد رکھنے اور جمع کرنے کا کام بعض صحابۂ کرام نے زمانۂ رسالت ہی میں شروع کر دیا تھا ، جو بلا انقطاع امت میں جاری رہا اور بہ تدریج ایک منضبط علم کے طور پر ترتیب پا گیا۔

اِسی طرح یہ تاثر بھی درست نہیں ہےکہ زمانۂ رسالت میں یا صحابہ کے زمانے میں حدیث کی جمع و تدوین کا کام اہتمام کے ساتھ اور دین کی نشر و اشاعت کی ذمہ داری کے طور پر کیا گیا ۔ خلفاے راشدین اور اُن کے بعد حضرت معاویہ رضی اللہ عنہ کا دور اِس اہتمام سے خالی ہے۔

احادیث کی ترتیب اور تہذیب کا جو کام ابنِ شہاب زہری نے شروع کیا تھا، اُسے اُن کے شاگردوں نے آگے بڑھایا۔ اُس میں سب سے نمایاں کام امام مالک بن انس اصبحی نے انجام دیا۔ اُنھوں نے احادیث کو ابواب میں ترتیب دے کر”موطا“ کے نام سے پہلا مجموعۂ احادیث مرتب کیا۔ اُنھوں نے اُسے 136ھ میں مرتب کرنا شروع کیا اور 158 ھ میں کتابی صورت میں مکمل کیا ۔اِس صدی ہجری میں حدیث کی جو کتابیں مرتب ہوئیں، اُن میں سنن ابو الولید (151ھ)، جامع سفیان ثوری (161ھ)، مصنف ابی سلمہ (167ھ)، مصنف ابن سفیان (197 ھ) اور جامع سفیان بن عیینہ (198 ھ) نمایاں ہیں۔ اِن کے علاوہ ابنِ جریج ، ابنِ اسحاق، اوزاعی، معمر اور بعض دیگر علما نے بھی حدیث پر کام کیا۔

تاہم، اِس دوسری صدی کے کام کا بیش تر حصہ محفوظ نہیں رہ سکا۔¹⁴

جھوٹی روایتوں کی کثرت

دوسری صدی ہجری میں جب احادیث کو جمع کرنے اور روایت کرنے کی اہمیت نمایاں ہونے لگی تو بعض سیاسی اور مذہبی عوامل کی بنا پر جھوٹی حدیثیں گھڑنے کا سلسلہ شروع ہو گیا۔ اِسے ہماری تاریخ میں وضع حدیث کے فتنے سے تعبیر کیا جاتا ہے۔ اِس فتنے کی شدت کا اندازہ خلیفہ ہارون الرشید (193 ھ – 149ھ) کے ایک واقعے سے کیا جا سکتا ہے۔ اُنھوں نے ایک شخص کو گرفتار کیا جو جھوٹی حدیثیں وضع کر کے اُنھیں لوگوں میں عام کرتا تھا۔ خلیفہ نے اُس جرم کی پاداش میں اُس کے لیے سزاے موت کا حکم صادر کیا۔ اِس پر اُس نے کہا کہ تم مجھے تو قتل کر دو گے، مگر اُن چار ہزار حدیثوں کا کیا کرو گے، جو میں گھڑ کر لوگوں میں پھیلا چکا ہوں اور جن میں سے ایک بھی رسول اللہ صلی اللہ علیہ وسلم کا ارشاد نہیں ہے۔¹⁵

جھوٹی حدیثیں گھڑنے والوں کے مقاصد

جھوٹی حدیثیں گھڑنے والوں میں کئی طرح کے لوگ تھے، جو مختلف مقاصد کے تحت حدیثیں تیار کیا کرتے تھے:

اِن میں اکثریت صالح اور عبادت گزار لوگوں پر مشتمل تھی۔وہ لوگوں کو عبادت کی طرف راغب کرنے کے لیے جھوٹی حدیثیں تشکیل دیتے تھے۔¹⁶

سیاسی مقاصد کے لیے بھی بے شمار احادیث وضع کی گئیں۔ اُن میں بنو امیہ اور بنو عباس کی حمایت و مخالفت اور حضرت معاویہ اور حضرت علی رضی اللہ عنہما کی حکومتوں کے حوالے سے بھی روایات شامل تھیں۔¹⁷

بعض دین سے گم راہ لوگ دین میں باطل بات کو داخل کرنے کے لیے حدیثیں وضع کرتے تھے۔¹⁸

جھوٹی احادیث گھڑنے کا ایک سبب مذہبی تعصب بھی تھا۔ چنانچہ اِس معاملے میں مخالف نظریے کی تردید اور موافق نظریے کی حمایت کے لیے بھی احادیث وضع کی جاتی تھیں۔¹⁹

بعض اوقات حکمرانوں کی خوش نودی اور انعام کے حصول کے لیے احادیث گھڑ لی جاتی تھیں۔²⁰

اِسی طرح واعظین بھی اپنے وعظ کو پر اثر بنانے کے لیے احادیث وضع کر لیتے تھے۔²¹

یہ معاملہ اِس سطح تک پہنچا ہوا تھا کہ بعض اوقات لوگ اپنی معمولی ضرورتوں کے لیے بھی حدیث گھڑ لیتے تھے۔²²

اُس زمانے میں قصہ گوئی کا سلسلہ بھی بہت زور پکڑ گیا تھا، چنانچہ داستان گوئی کے لیے بھی روایتیں گھڑی جاتی تھیں۔²³

یہ اِسی کا نتیجہ ہے کہ سنن ابوداؤد کے مصنف امام ابوداؤد سجستانی کو اہل مکہ کے نام اپنے ایک مکتوب میں لکھنا پڑا :

’’سفیان اور وکیع جیسے عظیم ناقدین حدیث بڑی محنت و کاوش کے بعد ایک ہزار احادیث کے ذخیرہ میں سے صرف ایک حدیث مرفوع متصل نکال سکتے تھے۔“

(حجۃ اللہ البالغہ 1/148)

جرح وتعدیل کا فن

وضع حدیث کے اِس فتنے نے محدثین کی احتیاط کو مزید بڑھادیا ۔ چنانچہ تابعین کے دنیا سے رخصت ہو جانے کے بعد راویوں کی جرح و تعدیل کے کام کا آغاز ہوا۔ ابتدائی طور پر اس معاملے میں یحییٰ بن سعید القطان (متوفی 189ھ) اور عبدالرحمٰن بن مہدی (متوفی 198) کو بہت شہرت حاصل ہوئی۔²⁴

احادیث کے رد و قبول کےاقدامات

اِس پورے پس منظر میں مسلمان اہل علم کی طرف سےجو بڑے اقدامات سامنے آئے، وہ یہ ہیں:

انکارِ حدیث

ایک یہ کہ بعض علمی گروہوں نے حدیث کو اصولی طور پر قبول کرنے سے انکار کیا۔ اِس معاملے میں معتزلہ اور خوارج نمایاں تھے۔ تاہم امت نے مجموعی طور پر اِس رویے کو رد کیا ، اور اپنی تاریخ میں حدیث کا انکار کرنے والوں کو کبھی پذیرائی نہیں بخشی۔

اسماء الرجال

دوسرے یہ کہ احادیث چونکہ راویوں کی روایت پر مبنی تھیں، اِس لیے ناگزیر تھا کہ اُن میں قابل اعتماد اور ناقابل اعتماد لوگوں کو الگ الگ کیا جائے۔ چنانچہ راویوں کے حالات زندگی کی تحقیق اور عیوب و محاسن کی تفتیش کا عظیم الشان کام شروع ہوا۔ اصطلاح میں اِسے’اسماء الرجال‘ سے تعبیر کیا گیا۔²⁵

اِسی ضمن میں موضوع اور جھوٹی حدیثوں کو چھانٹنے کا عمل بھی ساتھ ساتھ شروع ہوا اور جرح و تعدیل کے اصولوں کی بنا پر موضوع حدیثوں کے بے شمار مجموعے مرتب کیے گئے۔²⁶

اصول حدیث

تیسرے یہ کہ سند کے ساتھ ساتھ متن کی جانچ پڑتال کا کام بھی شروع کیا گیا۔ اِس کا مقصد یہ تھا کہ احادیث کو قرآنِ مجید، سنتِ ثابتہ اور عقل عام کی روشنی میں پرکھا جائے اور جو احادیث اُن سے غیر مطابق ہوں، اُنھیں رد کر دیا جائے۔ اِس ضمن میں اصول حدیث کی کتب تالیف کی گئیں۔

صحیح احادیث کے مجموعے

چوتھے یہ کہ اُن احادیث کو مجموعوں کی صور ت میں جمع کیا گیا، جن کی نسبت نبی صلی اللہ علیہ وسلم سے متحقق اور قابل اطمینان تھی۔ چنانچہ امام بخاری، امام مسلم، امام احمد بن حنبل، امام ابو داؤد ، امام ترمذی، امام نسائی، امام ابن ماجہ اور متعدد محدثین نےاپنی تحقیقات اور اپنے اصولوں کی روشنی میں قابل اعتماد احادیث کے مجموعے ترتیب دیے۔

ردو قبول کے معیارات

پانچویں یہ کہ امت کے جلیل القدر علما اور فقہا نے احادیث کو حرزِ جاں بنایا اور اُن کی تحقیق و تفتیش اور جمع و تدوین میں کوئی دقیقہ فرو گذاشت نہیں کیا۔اُنھوں نے پوری احتیاط کا مظاہرہ کرتے ہوئے اُن سے حاصل ہونے والے علم کو درجۂ ظن میں رکھااور اُن کی قبولیت کے لیے انتہائی کڑے معیارات کو قائم کیا۔

احادیث کے رد و قبول کے معیارات

فقہا نے فقہی آرا کے لیے احادیث سے استشہاد کا سلسلہ شروع کیا۔ اِس ضمن میں اُنھوں نے قبول عام معیارات کے ساتھ اپنے اپنے نظریے کے لحاظ سے خاص معیارات بھی متعین کیے۔

مثال کے طور پر امام مالک نے طے کیا کہ اخبارِ آحاد کی صورت میں روایت ہونے والی احادیث کو اہل مدینہ کے عمل کی روشنی میں دیکھا جائے گا۔ اگر وہ اُس کے مخالف ہوئی تو اُسے رد کر دیا جائے گا۔امام ابو حنیفہ کے نزدیک خبرِ واحد اُس صورت میں قبول ہو گی ، جب وہ قرآنِ مجید اور سنتِ مشہورہ کے خلاف نہ ہو۔امام شافعی نے خبرِ واحدکو صحیح الاسناد ہونے کی بنا پر قبول کرنے کا طریقہ اختیار کیا،لیکن اُنھیں اخبارِ خاصہ (چند افراد تک محدود رہنے والی خبریں)قرار دے کر اخبارِ عامہ (اجماع و تواتر سے ملنے والی خبریں) کے تابع رکھنے کا فیصلہ کیا۔

مطلب یہ ہے کہ احادیث کے رد و قبول کے معیارات کے تعین میں اہل علم کے مابین ہمیشہ فرق قائم رہا۔ یہ اِسی کا نتیجہ ہے کہ ایک حدیث ایک محدث یا فقیہ کے نزدیک مقبول ہوتی ہے، مگر دوسرے محدث یا فقیہ کے نزدیک مردود قرار پاتی ہے۔²⁷

امام مالک اور امام ابو حنیفہ نے احادیث کو قبول کرنے کے لیے نسبتاً زیادہ سخت معیارات قائم کیے، اِس لیےاُنھوں نے متعدد ایسی روایتوں کو قبول کرنے سے انکار کیا، جو اُن کے نزدیک دین کی اساسات کے خلاف اور قرآن وسنت سے معارض تھیں ۔

اُن کے اِس عمل کو بعض علما اور علمی گروہوں نے ہدفِ تنقید بنایا اور بعض نے انکارِ حدیث یا اپنی راے کو حدیث پر ترجیح دینے کا الزام عائد کیا۔

تاہم علماے امت کی اکثریت نے ایسے الزامات کی تردید کی ۔ امام ابن عبدالبر ’’جامع بیان العلم وفضلہ‘‘ میں لکھتے ہیں:

”امام ابوحنیفہ کسی عناد کی بنیاد پر احادیث کی مخالفت نہیں کرتے تھے، بلکہ قوی دلائل و براہین کے پیش نظر بنا بر اجتہاد آپ نے یہ موقف اختیار کیا تھا، اِس لیے اگر آپ کا یہ اجتہاد غلط ہے تو اُن کو ایک اجر ملے گا اور اگر درست ہے تو دو اجر۔ آپ کو ہدفِ نقد و جرح بنانے والے یا تو حاسد ہیں اور یا اجتہاد کی حقیقت سے بے گانہ اشخاص۔“

جلیل القدر فقہا اور محدثین میں کوئی ایک امام بھی ایسا نہیں ہے، جس نے متعدد احادیث کو بہ وجوہ رد نہ کیا ہو۔²⁸

احادیث کے مجموعے

تیسری صدی ہجری میں حدیث کی جمع و تدوین کا کام زیادہ ذوق و شوق اور اہتمام کے ساتھ سامنے آیا۔ اِس صدی کی نمایاں تالیفات یہ ہیں:

کتاب الام للشافعی(204ھ)،

مسند الطیالسی (204ھ)،

مصنف عبدالرزاق (211ھ)،

مصنف ابنِ ابی شیبہ (235ھ)،

مسند احمد بن حنبل( 241ھ)،

الجامع الصحیح للبخاری( 256ھ)،

الجامع الصحیح للمسلم( 261 ھ)،

سنن ابو داؤد( 275 ھ)،

الجامع للترمذی(279 ھ)،

سنن ابنِ ماجہ( 273 ھ)،

سنن نسائی (303ھ)،

اِن میں سے موخر الذکر چھ کو صحاح ستہ کے نام سے شہرت حاصل ہوئی۔

احادیث کے مجموعوں پر اتفاق و اختلاف

یہ اور اِن کے بعد تالیف ہونے والے درجنوں مجموعہ ہاے حدیث کے حوالے سے دو سوال اہم ہیں:

ایک یہ کہ کیا اِن میں نقل احادیث کی صحت کے بارے میں علما کے مابین اتفاق پایا جاتا ہے؟

دوسرے یہ کہ کیا محدثین نے اپنے مجموعوں میں اپنی محققہ تمام روایات کو بالاستیعاب شامل کیا ہے؟

اِن دونوں سوالوں کا جواب نفی میں ہے۔

ہر مجموعۂ حدیث پر دیگر علما و محدثین کی طرف سے نقد سامنے آیا ہے۔

مثال کے طور پر مسند احمد بن حنبل کے بارے میں بعض علما کی راے ہے کہ اُس میں صحیح، ضعیف اور موضوع، ہر طرح کی روایات شامل ہیں۔ ابن الجوزی نے مسند کی 29 احادیث کو موضوعات میں شمار کیا ہے۔ عراقی کہتے ہیں کہ مسند میں ضعیف احادیث تو یقیناً موجود ہیں، بلکہ احادیثِ موضوعہ بھی ہیں، جن کو میں نے ایک جز میں یک جا کر دیا ہے۔ امام احمد کے بیٹے عبداللہ نے مسند میں جو اضافے کیے ہیں، اُس میں ضعیف اور موضوع، سب قسم کی روایات موجود ہیں۔²⁹

جہاں تک اِس مسئلے کا تعلق ہے کہ محدثین نے اِن مجموعوں میں اپنی دریافت شدہ تمام روایتوں کو شامل کیا ہے تو اِس کے جواب میں صرف بخاری و مسلم کے کام سے صورتِ حال کا اندازہ ہو جائے گا۔

امام بخاری کا قول ہے کہ اُنھوں نے خوفِ طوالت سے بعض صحیح احادیث کو ترک کر دیا۔³⁰ امام مسلم کے بہ قول اُنھوں نے صرف وہی احادیث اپنی کتاب میں شامل کی ہیں، جن کی صحت پر علما کا اتفاق ہے۔³¹

بخاری ومسلم کے اِس فیصلے کو بعض محدثین نے ہدفِ تنقید بھی بنایا ہے۔ مثلاً ابنِ حبان کہتے ہیں کہ بخاری و مسلم پر یہ اعتراض کیا جا سکتا ہے کہ اُنھوں نے بعض ایسی احادیث کو شامل نہیں کیا، جو اُن کے شرائط کے مطابق صحیح کے درجے کی تھیں۔³² امام دارقطنی کا قول ہے کہ بخاری و مسلم نے نبی صلی اللہ علیہ وسلم کی متعدد احادیث کو اپنی کتب میں شامل نہیں کیا ، دراں حالیکہ اُن کے اپنے شرائط کے مطابق اُنھیں شامل کرنا ضروری تھا۔³³ امام بیہقی کہتے ہیں کہ اِن محدثین نے ’’صحیفۂ ہمام بن منبہ‘‘ کی بعض روایات کو شامل کیا ہے اور بعض کو شامل نہیں کیا، جب کہ اِس صحیفے کی روایات کا سلسلۂ اسناد ایک ہی ہے۔³⁴ امام حاکم ابو عبداللہ نیشاپوری نے اپنی کتاب ’’معرفۃ علوم الحدیث‘‘ میں متعدد ایسے راویوں کا ذکر کیا ہے، جو ثقہ ہیں، مگر بخاری و مسلم نے اُنھیں قبول نہیں کیا۔ اُن میں صحابہ،تابعین اور تبع تابعین شامل ہیں۔ اِسی طرح یہ بھی حقیقت ہے کہ بخاری و مسلم نے امام ابو حنیفہ، امام شافعی سے موقع اور معاصرت کے باوجود روایات نہیں لیں۔ امام بخاری نے امام احمد سے روایت نہیں لی اور امام مسلم نے امام بخاری کی سند سے کوئی روایت نہیں لی۔³⁵

خلاصۂ کلام

1۔ محدثین کا اپنی دریافت شدہ اور محققہ صحیح احادیث میں ترک و اختیار کا رویہ اور ثقہ راویوں میں سے کئی راویوں سے روایات نہ لینے کا فیصلہ اِس امر کو ثابت کرتا ہے کہ حدیث کی جمع و تدوین کو انفرادی اور اختیاری کام سمجھا جاتا ہے۔ محدثین اپنی ذاتی تحقیق، ذاتی اطمینان اور ذاتی ذوق کی بنا پر روایات کا انتخاب کرتے تھے اوراُسے اپنی ذاتی کاوش کے طور پر پیش کرتے ہیں ۔ اُن کے کام میں دوسروں سے اختلاف پایا جاتا تھا اور وہ اپنے کام سے اختلاف کی گنجایش کو تسلیم کرتے تھے۔

2۔ اِن کی تحقیق و تنقیح کا کام مسلسل جاری رہتا ہے۔ اِس معاملے میں انتہائی کڑے معیارات پر پرکھنے کے بعد اِن کے رد و قبول کا فیصلہ کیا جاتا ہے اور اِس فیصلے کے بعد بھی نظر ثانی کا سلسلہ جاری رہتا ہے ۔ اِس کی وجہ یہ ہےکہ علما و محدثین جانتے ہیں کہ رسول اللہ صلی اللہ علیہ وسلم کے حوالے سے کسی مشتبہ بات کی روایت دنیا اور آخرت ، دونوں میں نہایت سنگین نتائج کا باعث بن سکتی ہے۔ لہٰذا وہ آپ کی نسبت سے روایت ہونے والی ہر خبرِ واحد کو زیرِ تحقیق لاتے ہیں اور سند اور متن، دونوں پہلوؤں سے اُس کا جائزہ لیتے ہیں۔ سند کے لحاظ سے وہ راویوں کی عدالت،³⁶ اُن کے ضبط³⁷ اور سلسلۂ روایت کے اتصال³⁸ کی جانچ کرتے ہیں۔کسی روایت کا متن کتنا ہی دل نواز کیوں نہ ہو، اگر وہ سند کے معیارات پر پوری نہیں اترتی تو اُسے رسول اللہ صلی اللہ علیہ وسلم سے منسوب کرنے سے صاف انکار کر دیا جاتا ہے۔ اِس کے بعد متن کا جائزہ لیا جاتا ہے اور یہ دیکھا جاتا ہے کہ آیا اُس میں کوئی چیز قرآن و سنت کے یا علم و عقل کے مسلمات کے خلاف تو نہیں ہے۔ اِن معیارات سے گزارنے کے بعد بھی اُسے یقین کے درجے میں نہیں، بلکہ غالب گمان کے درجے میں رکھا جاتا ہے۔ یعنی اُنھیں نبی صلی اللہ علیہ وسلم کی نسبت سے قطعی الثبوت نہیں، بلکہ ظنی الثبوت سمجھا جاتا ہے ۔ اِسی بنا پر اِن کے رد و قبول کے معاملے میں محدثین اور فقہا کے مابین اختلاف بھی عام ہے۔بعض اوقات ایک محدث ایک راوی کو ثقہ سمجھتا ہے، جب کہ دوسرا ایسا نہیں سمجھتا ۔ اِسی طرح بعض اوقات ایک فقیہ ایک روایت کو درایتاً قبول نہیں کرتا، جب کہ دوسرا قبول کر لیتا ہے۔ اِس کا لازمی نتیجہ یہ نکلتا ہے کہ ایک روایت بعض علما کے نزدیک مقبول اور بعض کے نزدیک نا مقبول یا مردود قرار پاتی ہے۔

3۔ حدیث کی تحقیق و تنقیح کا یہ کام نہ کسی فرد تک محدود ہوتا ہے اور نہ کسی زمانے میں مقیدہوتا ہے۔ یہ مسلسل جاری رہتا ہے۔ وقت گزرنے کے ساتھ مزید لوگ میدان میں آتے ہیں اور اِس ذخیرے کو کھنگال کر نئی تحقیقات سامنے لے آتے ہیں۔ مثلاً حدیث کی نمایاں کتابوں میں سے موطا امام مالک اور صحاح ستہ کے نسخے 150 ھ تا 300ھ کے درمیان تالیف ہوئے۔ابو یعلیٰ، دار قطنی، مستدرک علی الصحیحین، بیہقی، دیلمی کے مجموعے 300ھ تا 500 ھ کے درمیان مرتب ہوئے۔ یہ کام دور حاضر میں بھی جاری ہے۔ چودھویں صدی ہجری میں علامہ ناصر الدین البانی کا کام اِس کی ایک نمایاں مثال ہے۔ علماے حدیث میں تحقیق کی استعداد کا تفاوت، حالات اور وسائل کے فرق اور روایت اور درایت کے اصولوں اور اطلاقات میں اختلاف ہی کا نتیجہ ہے کہ حدیث کے بیسیوں مجموعے مرتب کیے جا چکے ہیں جو اپنے متن کے لحاظ سے ایک دوسرے سے مختلف ہیں۔ اُن میں احادیث کی تعداد میں بھی فرق ہے اور مقبول و مردود کی تعیین میں بھی اختلاف ہے۔

مدعا کی تفہیم کے لیے یہ چند مثالیں کفایت کریں گی۔ ایک مثال امام دارقطنی کی ہے، جنھوں نے اپنی کتاب ’’الالزامات والتتبع‘‘ میں بخاری ومسلم کی کم و بیش دو سو روایتوں کی اسناد پر نقد کیا ہے۔³⁹دوسری مثال محمد بن عبداللہ حاکم نیشاپوری کی ہے۔ اُنھوں نے اپنی کتاب ’’المستدرک علی الصحیحین‘‘ میں امام بخاری اور امام مسلم کے اصولوں کو بنیاد بنا کر ایسی روایات کو شامل کیا ہے، جنھیں صحیحین میں درج نہیں کیا گیا۔ یہ امام بخاری اور امام مسلم سے کم و بیش ڈیڑھ سو سال بعد کا کام ہے۔اِ س لحاظ سے اِسے صحیح بخاری اور صحیح مسلم کی توسیع کا کام بھی کہا جا سکتا ہے۔دورِ حاضر میں علامہ ناصر الدین البانی کا کام بھی حدیث کی تحقیق وتدوین پر مشتمل ہے۔ اُنھوں نے بخاری اورمسلم کی قرار دادہ کئی صحیح احادیث کو ضعیف قرار دیا ہے اور کئی ضعیف احادیث کو حسن اور صحیح کے درجے میں رکھا ہے۔

4۔ حدیث کی تحقیق و تدوین کے کام کا یہ تسلسل اِس حقیقت کو واضح کرتا ہے کہ علماے امت ذخیرۂ احادیث میں دستیاب روایتوں کی رسول اللہ صلی اللہ علیہ وسلم سے نسبت کو یقینی نہیں سمجھتے۔ اگر وہ اِسے یقینی سمجھتے ہوں تو اِس میں نہ تحقیق کی جسارت کر سکتے ہیں اور نہ کسی اختلاف کو گوارا کر سکتے ہیں۔ مطلب یہ ہے کہ اگر یہ یقین ہو کہ فلاں الفاظ یا فلاں اقوال رسول اللہ صلی اللہ علیہ وسلم ہی کے فرمودہ ہیں تو اُن کی کھوج کرید کرنا اور اُن میں اختلاف کی راہ ڈھونڈنا ایمان کے منافی ہے۔ کوئی مسلمان اِس کا تصور بھی نہیں کر سکتا۔⁴⁰

5۔حدیث کے حوالے سے یہی وہ مسلمہ حقائق ہیں، جن کی بنا پر استاذ گرامی جناب جاوید احمد غامدی کا موقف ہے کہ اِنھیں قرآن و سنت کے برابر نہیں ، بلکہ اُن کے تابع اور ماتحت رکھنا چاہیے اور اِن کے مندرجات کو دین میں کسی منفرد اور مستقل بالذات حکم کی بنیاد نہیں بنانا چاہیے۔

____________